一期一會的梅酒季節又到 零失敗自家釀梅酒

每年四五月，就是青梅上市的時候，大家在超市同街市會見到又圓又飽滿的青梅，便知道 一期一會嘅梅酒季又到了！

想揀靚青梅浸酒，最緊要係要夠大粒，形狀飽滿、顏色翠綠就最正！ 記得要確保青梅表面無傷痕～好多時4至5月頭買到嘅梅都係來自本地或內地嘅品種；如果要買日本青梅，例如南高梅、紫姬梅等等，就要等到五月底、六月初。我多數會去日式超市買青梅，個人最鍾意係南高梅，梅皮薄啲，果肉相對較軟同比較甜。

至於用嚟浸梅酒嘅酒，除咗可以用清酒，仲可以用威士忌、燒酎或糯米酒等。梅酒一般浸3至6個月就可以飲，但係酒精濃度越高，浸酒嘅時間就要耐啲，當然浸酒時間愈長，酒都會愈醇啦！每次浸酒至六個月左右，我那愛酒的老公便會急不及待開瓶，其實浸梅酒最好浸夠一年，咁樣味道才夠濃郁，所以我強烈建議大家要忍忍口呢！

趁着青梅季節開始，即刻按入內文睇下點樣浸梅酒，慢慢品嚐下自家釀梅酒啦！

梅酒材料：

• 青梅 – 1kg
• 冰砂糖 – 1kg
• 清酒 – 1800ml
• 玻璃樽(4L) – 1個

梅酒做法：

1. 洗淨玻璃樽，倒入滾水沖洗一次，待乾透後用廚紙加少許清酒將玻璃樽內抹一次

2. 青梅逐顆洗淨，封乾後，用牙籤把青梅的果蒂除去，在梅身拮幾下

3. 先在樽底鋪一層梅，然後加入一層糖，如此類推填滿整個玻璃樽，之後注入清酒

• 

4. 三個月後可試味，如果味道較淡，可以持續浸多半年至一年。浸足一年，味道會更佳

小貼士:

• 記住青梅一定要乾身才好放入樽內，否則梅在浸的過程中會發霉。
• 密封後，整樽放在陰涼的地方，間中取出來搖一搖，令梅可以均勻地吸收。
• 最少浸3個月便可以飲用，浸足一年味道會更佳