成日俾蚊咬？6種天然驅蚊方法

踏入初夏，啲蚊走晒出嚟針人喇，為咗令大家出街、郊遊甚至係喺屋企唔好俾蚊針，今次同大家分享6種天然嘅驅蚊方法，希望大家唔洗成日俾蚊咬！

1. 植物精油

唔少植物精油都有驅蚊效果，例如香茅油、檸檬草油、檸檬桉油同薄荷精油都有防蚊效果，不過最好就先稀釋精油先搽落皮膚，以免灼傷啦！

2. 咖啡渣驅蚊

將風乾過嘅咖啡渣放入耐熱嘅器皿點燃，咖啡味嘅煙霧可以趕走啲蚊。（開火時要小心，唔好整親自己！）

3. DIY防蚊中藥包

用中藥藥材自製防蚊包，材料有丁香、艾葉、藿香、薄荷、石菖蒲、白芷、金銀花同蘇葉，再將以上8種藥材各5克打碎放入紗包。如果將防蚊中藥包放喺風扇前，將藥味吹散開效果就會更佳。

4. 柚子皮自製蚊香

將柚子皮切成長長嘅蚊香形（用半個柚子皮，剪成1cm闊），然後放入微波爐用中烘乾，每次2分鐘，大約4，5次就完全收乾，之後用繩連住柚皮末端掛起，掛喺門口或窗台等通風口就可以。

5. 種防蚊植物

有唔少植物嘅特殊香氣有驅蚊效果，例如薄荷、貓薄荷、迷迭香、薰衣草、藿香、香茅、菖蒲、夜來香、天竺葵等。喺露台或窗台種呢類植物，可以驅蚊之餘，仲有一室花草香氣㖭。

6. 電風扇驅蚊

最後有個好簡單嘅方法，就係開風扇直接吹散吸引蚊嘅氣體，例如我地呼吸釋出嘅二氧化碳、汗液中嘅乳酸同皮膚細菌嘅代謝物等。