藍花楹 5大香港賞花好去處

每年4月到6月都係藍花楹嘅花期，一片紫藍花海好不浪漫，吸引好多人打卡，香港唔少公園都可以見到藍花楹，今次就介紹其中5個賞花好去處，想趁藍花楹盛放打卡就要好好睇落去！

5大藍花楹賞花好去處

1. 全港最多：沙田中央公園

沙田中央公園嘅藍花楹數量係全港最多，喺源禾路出入口位置有成十幾棵，打卡就啱晒！而且附近亦有草地，可以邊野餐邊賞花，不過記得走嘅時候帶走自己嘅垃圾喇！交通方面可以由沙田港鐵站去，行路7至10分鐘到達。

2. 郊遊之選：嘉道理農場

如果你打算賞花兼郊遊，可以去近月重溫嘅嘉道理農場，內容豐富，有好多不同動植物，非常值得大家搵日搭車入去遊覽兼賞花。想睇藍花楹，就要去素食亭，旁邊一棵藍花楹被稱為「香港藍花楹之王」，十分壯觀。交通方面可以由元朗或大埔墟出發坐64K巴士，喺嘉道理農場站落。

3. 交通方便：灣仔星街/ 太古廣場三期

喺太古廣場三期旁邊小斜坡，灣仔星街同萬茂里交界，都可以搵到藍花楹，雖然剩係得一棵，不過喺正鬧市中，唔洗專登山長水遠去睇，可以坐港鐵喺金鐘港鐵站F出口出。

4. 賞花熱點：荔枝角公園

每逢周末都吸引大批遊人，荔枝角公園一向都係賞花打卡熱點，除咗藍花楹以外仲有唔少其他靚花添。要留意係，荔枝角公園其實比較近美孚地鐵站，如果搭港鐵可以喺美孚站D出口出。

5. 港島之選：維多利亞公園

鬧市嘅賞花熱點又點少得維多利亞公園，維園嘅藍花楹喺近銅鑼灣地鐵站嘅入口，但聽講幾棵藍花楹中只有一棵係比較多花，幾餘幾棵就冇咁茂密。交通可以喺銅鑼灣港鐵站E出口或者天后站A2出口。