一醬解鄉愁 港式口味──豆豉蒜蓉辣椒醬

俗語云：巧婦難為無米炊。
正所謂：無氈無線，神仙難變。
有煮開飯嘅老友記，廚房梗有一兩樽救命醬料傍身。即是當你諗唔到煮乜，或者大家都冇乜胃口，甚或買唔到靚靚食材。呢個時候，如果你家廚房有一樽靚醬料，咁就即係等如有個無敵大將軍，簡直遇佛殺佛、遇魔斬魔。尤其是，如果大家曾經移民，定試過期待親戚寄來香港口味辣椒醬，以一醬解鄉愁。

我家其中一樽無敵醬料，百分百港式口味，就係呢樽豆豉蒜蓉辣椒醬。

香港小品牌 手工製造

唔係一般大品牌生產嘅蒜蓉豆豉醬咁簡單，呢樽豆豉蒜蓉辣椒醬，本地小品牌製作，不含防腐劑，完全無添加，豆豉鹹香、蒜蓉惹味、指天椒爽辣，打開蓋便能嗅到一股濃郁的香氣。材料超簡單，植物油、蒜頭、指天椒、豆豉、黑豆、鹽、薑，清清楚楚，冇古靈精怪。製作看似簡單，咪就係炒香豆豉、蒜頭和指天椒，但講求嘅係三種食材的比例及炒製的時間、火候，要做到辣中有香，香中有鹹，鹹中有鮮，咁至叫做出色，咁至叫做有層次。

舀一兩羮，撈勻排骨蒸，那股肉香會被引出嚟。即使排骨唔買新鮮買冰鮮，呢隻醬都可以起死回生，幫手隱惡揚善，成碟排骨變得生猛鮮活，油鮮辣香，又有豆蒜鹹惹，撈汁都可以送兩碗飯。

如果捨得，舀多一點，可以用嚟蒸魚。尤其大魚頭，買一個開雙飛，魚頭上面大羮大羮鋪滿豆豉蒜蓉辣椒醬，隔水一蒸，蓋一打開，香氣和鮮味，隨住空氣飄滿一室，真係口水都流。魚頭要啜至好食，和豆豉蒜蓉辣椒醬滲晒入魚頭裏，用條脷，鑽魚肉、啜魚雲，愈啜愈過癮，咁至發揮到呢隻醬嘅靈魂。

講到呢度，自己都猛吞口水。

贈予海外家人解鄉愁

翻查網上資料，原來呢隻醬，背後有個古仔。話說這款住家靚醬出品人Nicole Wong係個靚太，佢奶奶極愛煮食，喜歡種菜種瓜果，屋企後院，種了很多辣椒樹，每臨收成，紅彤彤的令人心花怒放，但又帶嚟煩惱，就係這麼多辣椒要怎麼用呢？餐餐辣椒送飯也吃不完呢！靈機一觸，不如做個豆豉蒜蓉辣椒醬吧！蒸魚、蒸排骨可以大派用場，吃炒麵炒米粉又可加入惹味升級，而且素葷皆宜，百搭好食。

最重要的還有一點，就係老奶奶一些家人在國外，特別想念住家飯的味道，煮多一點，可以送俾親人帶到海外，每逢思鄉，就可以自己郁手，蒸魚、蒸排骨，吃的豈只係味道，而是飄香的親情，教人如何不想它。

譚偉健 簡介

譚偉健，50+，資深傳媒人，游走香港各大傳媒逾四分一世紀，主力撰寫及拍攝飲食及旅遊文章及短片，近年自立門戶，在Facebook設立【跟住爸爸食買玩  譚偉健】專頁，繼續發掘及分享生活品味。

跟住爸爸食買玩 譚偉健 
https://www.facebook.com/foodiebabatraveller/