抗疫搵食記神湯級靚牛火鍋送上門

一場瘟疫，已經無啖好食。再來一招限人令，出街食飯成泡影。呢個時候，人人自救，個個匿返屋企煮飯仔。仲想打邊爐？簡直係天方夜譚咁困難。

又未必。香港人，點會坐以待斃？

好似有十八年歷史，深井火鍋老字號滾得棧，最近疫境自救，推出火鍋送上門。早前第一擊，推出4至6位火鍋套餐，收$988，圍起嚟一百蚊個都唔使，真係抵過去舖頭食。係就係好，可惜我屋企得3個人，太多食唔晒，結果得個恨字。

最近，佢哋終於轉腦筋，強推3款2-3位套餐，牛皇$588主力食牛肉、海皇$688主力食海鮮、皇牌$588牛肉海鮮都有啲。仲有11款湯底揀，好似海底椰濃豬骨湯底、四川麻辣湯底、味菜胡椒豬肚湯底、秘製沙嗲湯底、皮蛋芫荽湯底、番茄薯仔湯底、甘筍玉米湯底、木瓜豬骨湯底等等。加錢仲可以升級，花膠響螺雞湯底、爽皮蘆薈椰子雞湯底、全隻麻辣雞湯底加$150、藥材醉雞湯底、人參清雞湯底、半隻麻辣雞湯底加$80。訂餐追加火鍋配料，配料仲有8折。

我一家三口決定升級花膠響螺雞湯底，柯打牛皇套餐，上晝打個電話落柯打，用轉數快俾錢，傍晚就成盒送嚟樓下，落去攞，隔箱摸到湯還是熱辣辣的。開箱，樣樣分門別類包好封好，牛拼盤有齊手切牛頸脊、牛肉粒、金錢𦟌、美國肥牛、牛眼筋，夠3個人食。鮮蝦雲吞、韭菜餃、梅菜豬肉餃共六粒，手打蝦丸、牛丸、墨魚丸、鯪魚丸共8粒，仲有一盒雜菌時蔬拼盤，連響鈴同炸魚皮都有。辣椒絲、蔥花、生蒜蓉、炸蒜蓉、豉油都齊。