唔使排長龍紐約名牌漢堡送到手

睇新聞，美國疫情愈爆愈厲害，每日竟然有過萬宗確診，睇CNN電視直播，重災區紐約，街道空無一人，連平日最旺嘅時代廣場，都一樣水盡鵝飛。

睇到紐約實景，想起紐約名店Shake Shack。佢係紐約人氣「街頭」漢堡品牌，創辦人丹尼‧梅爾（Danny Meyer）2001年開始在麥迪遜廣場販售熱狗，2004年開始變成快餐車，充滿紐約風格的熱狗，吸引愈來愈多人，知名度也愈來愈高，最後搬到麥迪遜廣場公園一個攤位，除供應熱狗，也擴展到漢堡、薯條、奶昔、奶黃、啤酒、紅酒等等，2014年開始公開募股，開始大規模擴充。現時美國本土已有達100個售賣點，海外亦有59個，遍布北美洲、歐洲、中東、澳洲及亞洲。早前終於嚟到香港開店，門口日日大排長龍，而家唔知點景況。

仲多唔多人排隊我唔知，只知道佢哋因應疫情，特設外賣自取及送餐服務，自取有六個點，包括中環IFC、金鐘太古廣場、銅鑼灣時代廣場、尖沙咀海港城、尖沙咀圓方、沙田新城市廣場。連門口都唔想出？去外賣平台Food Panda預訂，就可以唔出門口，有人送餐俾你，服務覆蓋金鐘、銅鑼灣、尖沙咀及沙田幾個區域。

有乜嘢好食？多了。

芝士漢堡ShackBurger，以全天然安格斯牛肉打造、素食漢堡Shroom Burger，餡料係原隻大啡菇夾流心明斯特及車打芝士。鍾意重口味，可以試SmokeShack，煙肉用美國全天然蘋果木煙燻加櫻桃辣椒粒做成，勁重煙燻香氣。喜歡雞肉的朋友，必叫全天然走地雞做的Chick’n Shack。唔好淨係掛住叫漢堡，記得加錢加香脆波浪薯條，條條有坑紋，特別好口感。