疫情持續肆虐，一波未平，一波又起，新一代變種病毒Omicron嘅出現令疫情增加咗好多變數。呢段時間大家為咗抗疫，除咗更加注意衛生，亦更加落力增強自己嘅免疫力。講起增強免疫力，好多都市人都會貪方便而選擇現成嘅營養補充品，例如呢幾年好流行嘅滴雞精、魚精。不過，好多時呢類補健品聲稱無添加，但係入面可能有包含藥材，未必適合所有體質嘅人士飲用。
其實想補身，唔一定要買現成嘅營養補充品嘅，大家可以嘗試自製燉肉汁去增強免疫力，湯水比現成補充品更加天然。講到底，自己整嘅飲落都會放心啲。每星期我都會燉一次肉汁俾囡囡飲，燉肉汁有滋補元氣嘅好處，一斤肉燉出1細碗精華，而且肉汁溫補而不燥，大人細路都啱飲！如果你嘅仔女成日捱更抵夜、屋企長者需要增強免疫力，又或者平時瞓得唔好、病後調養等，都可以飲返碗燉肉汁補身。如果想再補啲，可以視乎個人需要加入杞子、花旗參、蟲草等。
燉肉汁材料：
瘦肉 － 1斤
燉肉汁做法：
1. 將瘦肉洗乾淨用廚房紙吸乾水份，可以切粒、切條或用攪拌機攪碎
2.將碗反轉放在鍋中間，然後將肉粒鋪在碗邊，放入蒸爐或者隔水蒸燉3小時
3.燉好之後，取出乾肉，拎開中間的飯碗，肉汁就會流出便完成
小貼士:
- 一斤瘦肉可以煮出一飯碗燉肉汁
- 建議用瘦肉或肉眼，燉出嚟嘅肉汁比較清
- 如果想加入花旗參片、杞子、蟲草等藥材，可以把藥材放在鍋中央，再將碗反轉放在鍋中間，然後將肉粒鋪在碗邊，最後放入蒸爐或者隔水蒸燉3小時
- 肉粒放在碗邊，不用大力壓入鍋底內，肉汁會自動流進碗中
- 燉好的肉汁不用加入任何調味，可以直接飲用
Love Kelly’s Kitchen 簡介
全職媽媽，喜歡烹飪。愛以簡單食材，配以便捷方法煮出美味菜式。烹飪帶給我無窮樂趣，透過網上平台【Love Kelly’s Kitchen】專頁，分享食譜、飲食生活、品牌合作，令生活更添色彩。
著作:《BRUNO-一口小吃大百科》
Comments are closed.