增強免疫力芋頭椰汁炆雞

疫情之下，商家紛紛推出保健品廣告，維他命、益生菌、什麼素什麼精華，看得人花多眼亂。健康的根源在於飲食，如果要數增強免疫力的食材，芋頭必定有份。芋頭營養價值高，味甘性平，有解毒通便之效，中醫更認為癌症病人手術後應多吃芋頭。

輕身唔墜手先係靚

近日逛街市，見菜檔有大大個芋頭，除了想起它夠健康，更想起它香甜軟糯，和椰汁十分匹配，甜的可以做椰汁芋頭西米露，鹹的當然是椰汁芋頭炆雞，登時食指大動，口水猛吞。

碩大的芋頭，有三四斤以上，外形似足炮彈，所以又叫炮彈芋。炮彈芋頭，係粵北特產，花都區炭步，樂昌的張溪，都有出產，都是名物。至於酒樓餐廳常見的荔芋乜乜乜，指的是廣西名物荔浦芋，都係數一數二靚品種。

菜檔阿叔，見我口噏噏，單手拎住個芋頭拋拋下，就知道我唔恰得。唔係畀我拋窒咗，而係芋頭一定要食粉，而粉的芋頭，必定要收乾水份，所以阿媽教落，拎起芋頭拋幾拋，睇下佢輕唔輕，墜唔墜手，輕身又唔墜手，先至係靚貨。

阿叔話，你識貨呀！呢隻芋頭，係張溪芋。我知，張溪村位於九瀧十八灘出口，溪水長流，泥土沖積，土質肥沃。種出的芋頭，檳榔花紋，又大又靚，澱粉質又高。阿叔猛話：「你識揀呀，呢個芋頭又粉又靚，呢呢呢！你睇！切開有啲紋幾密！」佢邊講邊用刀劈開少少畀我睇，以示正貨。

既然係咁，唔劈都劈咗，我要咗佢啦！

新鮮椰漿夠鮮活

然後去凍肉舖，買大大隻急凍雞搥，因為煮濃味餸，唔使買新鮮都得。反而跟手去買椰漿，要講究啲。買椰漿，一般人求其超市買快達牌罐頭貨就算，但係罐頭椰漿同新鮮椰漿，味道相差何只千里。罐頭椰漿死咕咕，新鮮椰漿鮮活活，好似有生命咁，所以唔好慳嗰少少，免得贏咗粒糖、輸咗間廠。

但係，鮮椰漿邊度有？

啱呀你，新鮮椰漿，而家真係買少見少。

舊時街頭巷尾，總有一兩間椰子香料舖，油麻地、旺角、灣仔、北角等都有椰子舖，大把即開椰子，大把新鮮椰漿。嗰時未有快達牌，椰子舖係相當重要的店舖。椰子全身是寶，椰衣做掃帚、椰殼做飯勺，椰子肉曬乾可以做椰絲，酒樓餐廳要做椰蓉卷、椰撻、雞尾飽都要靠佢。椰子肉亦可以榨汁，溝冰打爛做椰汁，唔溝就係椰漿，南洋菜館做咖喱，一定要用佢。仲有結婚過大禮，亦要訂原個椰子寫上個「囍」字，稱為囍椰，取其有爺有子的意思。

但自從罐頭椰漿入口，椰子舖已經冇人幫襯，要專行兼賣香料。而家旺角新填地街、灣仔春園街、土瓜灣、北角都仲有幾檔，可以買到新鮮椰漿。爸爸住大埔，好在富善街街市嗰邊有椰汁檔，可以搵到新鮮椰漿，買一支就夠用。

返屋企，開工。

芋頭當然要先去皮。等陣，芋頭去皮，唔好就咁用手切，因為芋頭會分泌啲乳白色粘液，當中含有「皂角甙」，接觸到令皮膚痕癢，所以記得要手戴手套呀。

至於個餸點做？睇埋下面啦！