fbpx

時勢唔好,買餸煮飯,一定要精打細算。
精打細算,有乜嘢辦法?辦法就在於你肯唔肯動腦筋,肯唔肯轉膊。
簡單啲講,即係打斧頭,個個阿媽都識啦!

點樣打斧頭?好似炆牛腩,好多人都鍾意食。
但係去牛肉檔買塊新鮮牛坑腩,動輒過百,而且唔多,一炆仲要兩頭縮,簡直寸寸千金,食到肉都赤埋。

新鮮牛腩貴,轉個彎,又有另一番風景。

雪藏燜煮一個鐘就得

係呀!就係雪藏貨!君不見最近凍肉舖,總係人頭湧湧,間間見人龍,就知精明嘅煮婦煮夫,個腦諗緊乜啦。其中雪藏牛肋條,只要烹煮做得好,唔會差得過新鮮好多。美國同巴西都有,前者貴啲,後者平啲,講真質素唔差得好遠,咁你自己識揀啦。

講咁耐,咁牛肋條係乜?其實即係牛肋骨嘅肉,去咗骨,就係牛肋條囉。佢係牛腹附近的肋骨位置,呢塊肉,肌里鬆軟,瘦多肥少,滲着油花、又帶筋膜,仲因為連骨肉,最濃最夠肉味,所以真係食得過。

佢仲有一個好處,就係新鮮牛腩要炆腍,閒閒哋三四個鐘頭,但係雪藏貨,反而炆一小時左右就得,慳番唔少燈油火蠟。放喺冰箱,閒閒哋擺一頭半個月都冇問題,簡直係貯糧之星。

臨煮前一小時先解凍

講到雪藏貨天下無敵咁,佢當然有缺點啦。一大包,雪到硬掘掘,要預早拎出嚟室溫解凍至用得,早一日由冰格轉至下層冷藏,臨整前一個鐘,取出放置室溫。千祈唔好貪快,直接放入鍋中煲熱,因為咁樣會令肉質變嚡,肉味大減。

呢隻牛肋條,係百變梅艷芳,可以用嚟炆清湯蘿蔔、可以炆咖喱,可以炆韓式醬,又可以落番茄、洋葱、甘筍、薯仔嚟炆,好味到可以送一煲飯。

番茄燜牛肋條 食譜(2-3人份)

材料:
1. 牛肋條 600克
2. 番茄 4個
3. 洋葱 1個
4. 甘筍 1條
5. 薯仔 2個
6. 蒜頭 4粒
7. 茄汁 2湯匙
8. 豉油 2湯匙
9. 冰糖 酌量
10. 紹酒 酌量
11. 清雞湯細盒

步驟:
1. 牛肋條解凍,切件入滾水汆水瀝乾備用。
2. 番茄切角、洋葱粗切備用。
3. 熱鍋下油爆香蒜頭,放洋葱、番茄和牛肋條爆炒。

熱鍋下油爆香蒜頭,放洋葱、番茄和牛肋條爆炒

4. 加豉油、水、酒、冰糖,下清雞湯及水蓋過材料為準。
5. 大火滾起,轉細火冚蓋炆45分鐘。

大火滾起,轉細火冚蓋炆45分鐘

6. 落茄汁拌勻收至稠密搞掂


譚偉健 簡介

譚偉健,50+,資深傳媒人,游走香港各大傳媒逾四分一世紀,主力撰寫及拍攝飲食及旅遊文章及短片,近年自立門戶,在Facebook設立【跟住爸爸食買玩  譚偉健】專頁,繼續發掘及分享生活品味。

跟住爸爸食買玩 譚偉健 
https://www.facebook.com/foodiebabatraveller/

Comments are closed.